أسئلة بتتسأل كتير

محل سمك أونلاين. بنبيع سمك وجمبري وكاليماري نيّ طازة، منظف ومقطع على ذوقك، تطبخه في بيتك. مفيش أكل جاهز ولا مطعم تقعد فيه: بتطلب من الموقع في أي وقت، ويوصلك تاني يوم الصبح على الثلج.

شغلنا كله على الطزاجة: بنجهز طلبك في صبحية يوم التوصيل نفسه، وبيوصلك على الثلج في صندوق مختوم. والصنف الوارد من بره زي السلمون بنقول عليه صراحة في وصفه.

تطلب في أي وقت، ليل أو نهار، ويوصلك تاني يوم في الميعاد اللي تختاره: من ٨ لـ ١١ أو من ١١ لـ ٢.

بتدفع أول ما تطلب: بتحوّل الإجمالي على محفظة الموبايل، والرقم بيظهر لك في صفحة إتمام الطلب. ولو تحب تدفع كاش لما الطلب يوصلك، الاختيار ده متاح برضه في نفس الصفحة.

بنوزن السمكة كاملة قبل التنظيف، وده العرف عند أي سماك. التنظيف والتقطيع اللي تختاره سعرهم ثابت للكيلو وبيظهر قدامك قبل ما تضيف للسلة.

لو صنف مش موجود بجودة نرضى عنها، بنكلمك الصبح بدري نتفق على بديل، أو نشيله من الطلب وتدفع أقل.

القاهرة الكبرى: التجمع الخامس والقاهرة الجديدة، والرحاب، ومدينتي، والشروق، والعبور، ومصر الجديدة، ومدينة نصر. لو منطقتك مش في القايمة دي، كلمنا على الواتس ونشوف.